AGOV - Voss nov login administrativ
AGOV è il nov login administrativ en Svizra. Vus pudais duvrar il login per la Confederaziun sco er per las autoritads chantunalas e communalas, per exempel sche Vus vulais far Vossa decleraziun da taglia. Grazia a novas tecnologias na duvrais Vus nagin pled-clav pli sin AGOV. Quai è pli segir e pli cumadaivel che cun in pled-clav. AGOV è in servetsch da la Confederaziun.
En sis pass avais Vus Voss login persunal dad AGOV
1. Avri la pagina d'internet, nua che Vus vulais As annunziar
La pagina d'internet, nua che Vus vulais As annunziar, po esser in portal da la Confederaziun, d'in chantun, d'ina vischnanca u la pagina ().
2. Tscherni tranter l'app u ina clav da segirezza
Il login dad AGOV funcziuna via smartphone u via clav da segirezza. Vus pudais tscherner sez la moda da login. Nus As recumandain da duvrar a medem temp dus apparats. Uschia è Voss access al login dad AGOV adina garantì. Er, sche Vus avessas da perder ina giada in apparat.
Opziun App AGOV access
Cun l'app AGOV access sin Voss smartphone pudais Vus As annunziar cun Face-ID, Face Unlock e.u.v. Vus pudais chargiar giu l'app AGOV access dal App-Store (iOS) u dal Play-Store (Android).
Opziun Clav da segirezza
Sche Vus n'avais nagin smartphone u sche Vus na vulais betg duvrar quel per As annunziar sin AGOV, pudais Vus duvrar Voss computer u Voss tablet ed utilisar per quest intent ina clav da segirezza. Sin agov.ch chattais Vus ina glista da las clavs da segirezza adattadas.
3. Registrai e confermai Vossa adressa dad e-mail
Registrai suenter Vossa adressa dad e-mail e confermai che Vus hajas prendì enconuschientscha da la decleraziun davart la protecziun da datas dad AGOV.
Vus survegnis alura automaticamain in code per e-mail. Endatai quel per confermar Vossa adressa dad e-mail.
4. Registrai Vossas datas persunalas
Sco proxim inditgais Vus en Voss conto d'utilisaziun Voss num, Voss prenum, Vossa data da naschientscha e.u.v.
5. Registrai Vossa app AGOV access u Vossa clav da segirezza
Colliai alura Vossa app AGOV access e/u Vossa clav da segirezza cun Voss conto d'utilisaziun.
6. Tegnai bain en salv Voss code da restabiliment
Sche Vus perdais Voss smartphone u Vossa clav da segirezza, pudais Vus restabilir Voss login dad AGOV cun agid d'in code. Quest code vegn generà automaticamain. Faschai ina copia da la clav da restabiliment generada u nudai tala insanua per Vus. Tegnai en salv la clav en in lieu segir, per che Vus hajas adina access ad AGOV. Eventualmain pudais Vus dar ad ina confamigliara u ad in confamigliar ina copia da Vossa clav da restabiliment ubain tegnair en salv copias da tala en plirs differents lieus.
Ussa pudais Vus As annunziar cun l'app AGOV access sin Voss smartphone u cun Vossa clav da segirezza via AGOV.
Meglierar la qualitad da la controlla da Vossa identitad
En tscherts cas na vegn la qualitad da Voss login persunal dad AGOV betg a bastar. Alura survegnis Vus automaticamain l'instrucziun, co che Vus pudais meglierar la qualitad da la controlla da Vossa identitad. Quai po vegnir fatg per posta, al spurtegl da posta, tar Vus a chasa u per video.