Disponibladad dad AGOV

Disponibladad e funcziun

AGOV vegn manà d'ina organisaziun 7/24 en ils centers da computers da l'administraziun federala, e sia disponibladad vegn survegliada automaticamain. La plattafurma e la software han ina gronda resilienza. Eventuals disturbis che sa mussan tuttina, vegnan eliminads da teams professiunals adina uschè svelt sco pussaivel.

Organisaziun da manaschi

L'organisaziun da manaschi è dividida en la gestiun da la plattafurma dad AGOV inclusiv sia banca da datas e la connectivitad ed en il funcziunament dal sistem dad AGOV (software dad AGOV). Tuts dus teams han in'organisaziun da manaschi 7/24 ed èn cuntanschibels da tuttas uras per telefon. Sch'i dat disturbis, vegn l'organisaziun da manaschi activada durant las uras da biro sur la chadaina da support sco er sur il monitoring automatic end-to-end ed ordaifer las uras da biro sur il monitoring automatic end-to-end e sur il pichet da telefon.

Disponibladad e support

Support per las utilisadras ed ils utilisaders finals

I n'exista nagin post da consultaziun central concernent AGOV, utilisadras ed utilisaders finals sa drizzan adina a quel post ch'è responsabel per l'applicaziun, per la quala i duai vegnir fatg il login; quests posts, p.ex. in uffizi chantunal u in uffizi federal, publitgeschan las pussaivladads da contact p.ex. sin las paginas da lur applicaziuns.

Support per las autoritads che participeschan

Il support per las autoritads che participeschan, vegn furnì tras il second-level-support durant las uras da biro exclusivamain sur il bigliet d'elavuraziun online ch'ellas han fixà.